အမေဘယ်လိုရှာမလဲ { ဖြစ်ရပ်မှန်ဆောင်းပါး }

မအားလို့ မရေးဖြစ်တဲ့ ကျွန်မအတွက် ရေးစရာအကြောင်းလေး ပေါ်လာပြန်တော့ ဖြစ်ကြောင်းကုန်စင် ရေးလိုက်ရပြန်ပါပြီ။

၁၆-၉-၂၀၁၃ ညနေ (၅) နာရီခွဲလောက်အချိန်မှာပေါ့ အသက် (၂၁) နှစ်အရွယ် တက်သစ်စ လူငယ်လေးတစ်ယောက် ထိုင်းနိုင်ငံ၊ မယ်ဆိုင်မြို့လေးမှာ ယောင်လည်လည်နဲ့ ဘယ်သွားရမှန်းမသိ၊ ဂျိုင်းထောက်ကိုအားပြုလို့ အမိမြန်မာနိုင်ငံအလံတွေ လွှင့်ထူထားတဲ့ တာချီလိတ်မြို့ကို မြင်လိုက်ရတော့ လှမ်းနေတဲ့ခြေလှမ်းတွေ၊ အမိမြန်မာနိုင်ငံကို အားကိုးကြီးစွာနဲ့ မယ်ဆိုင်-တာချီလိတ် အမှတ် (၁) ချစ်ကြည်ရေးတံတားပေါ်မှာ ယိုင်နဲ့နဲ့ခြေလှမ်းတွေနဲ့ အားအင်တွေထည့်ပြီး လျှောက်ခဲ့တာ ည (၆) နာရီ မှောင်စပျိုး တံတားကြီးပိတ်တော့ တာချီလိတ်မြို့ကို ရောက်ခဲ့ရပြီပေါ့။

တာချီလိတ်မြို့ကို ရောက်ခဲ့ပြန်တော့ အားကိုးစရာ ရှာခဲ့ရပြန်ပါတယ်။ အားတင်းလျှောက်နေရင်း ဗြုန်းဆို မိုးတွေ ရွာချလိုက်ပါရော၊ ကံဆိုးမသွားရာ မိုးလိုက်လို့ရွာဆိုသလို အသိမရှိ၊ သွားစရာမရှိ၊ စားစရာမရှိ အားငယ်စိတ်တွေနဲ့ ပြန်လာခဲ့ပေမယ့် ဘယ်သွားလို့ ဘယ်လာရမှန်းမသိတော့ ရှေ့မှာမြင်တွေ့ရတဲ့ ရပ်ကွက်ရုံးလေး တစ်ခုကိုဝင်ပြီး နားခိုခွင့်လေးတောင်းလိုက်ပါတယ်။ အော်သာခေါ်နေပေမယ့် ရုံးထဲမှာ လူမရှိတဲ့အတွက် အိပ်စက်နားခိုခွင့် မရခဲ့ပါဘူး။

ဒီလိုနဲ့ နီးစပ်ရာ ရှမ်းဘုန်းကြီးကျောင်းကို သွားရောက်ပြီး အိပ်ခွင့်တောင်းပေမယ့် မိုးတွေရွာနေတာရယ်၊ ဂျိုင်းထောက်တစ်ဖက်နဲ့လူမို့ တောင်းစားတဲ့သူများ ထင်သလားမသိ၊ အိပ်စက်နားခိုခွင့်မရခဲ့ပြန်ပါဘူး။ မိုးသည်းသည်းမှာ အားတင်းပြီး ခေါင်းငိုက်စိုက်ချကာ လမ်းမအတိုင်း လျှောက်လိုက်တာ အမှတ် (၁) ချစ်ကြည်ရေးတံတားပေါ်ကို ပြန်ရောက်ခဲ့ပါတယ်။ တံတားပေါ်က ကူညီပါရစေဆိုတဲ့အတိုင်း မြန်မာနိုင်ငံရဲတပ်ဖွဲ့ဝင်များ တာဝန်ကျတဲ့ရုံးခန်းကို အားကိုးကြီးစွာရောက်ခဲ့ရပါတယ်။ ရဲတပ်ဖွဲ့ဝင်တစ်ဦးရဲ့ စာနာကူညီမှုကြောင့် မိုးစိုနေတဲ့ အဝတ်တွေလဲခွင့်ရပြီး တစ်ညတာ ရဲကင်းမှာ အိပ်စက်ခဲ့ရတဲ့အတွက် ကောင်လေးရဲ့ ရင်မှာ ကျေးဇူးတင်နေမိပါတယ်။ ရဲတပ်ဖွဲ့ဝင်ရဲ့ ကူညီပြောပြမှုကြောင့် (၁၇-၉-၂၀၁၃) နံနက်မှာ တာချီလိတ်မြို့ ပြန်လည်ထူထောင်ရေးစခန်းရှေ့ကို ရောက်ခဲ့ရပါတယ်။

ပြန်လည်ထူထောင်ရေးရုံးဟာ မူးယစ်ဆေးဝါးဖြတ်ပြီးတဲ့ သင်တန်းသားတွေနေတဲ့ နေရာဖြစ်တဲ့အတွက် ဘယ်သွားရပါ့မလဲဆိုတဲ့ အသိတွေနဲ့ ဝမ်းနည်းအားငယ်နေတဲ့ ကောင်လေးအကြောင်း သိရတော့ မဇ္ဈိမလူမှုကူညီရေးအသင်းမှ ပြန်ကြားရေးတာဝန်ယူထားတဲ့ မောင်ထက်ကျော်လင်းနဲ့ အတူကျွန်မ ကောင်လေးရှိနေတဲ့ ပြန်လည်ထူထောင်ရေးရုံးရှေ့ကို ရောက်ခဲ့ရပါတယ်။

 ကောင်လေးကိုတွေ့လိုက်တာနဲ့ ကျွန်မရင်ထဲ စိတ်မကောင်းခြင်း များစွာဖြစ်မိပါတယ်။ ဂျိုင်းထောက် တစ်ဖက်နဲ ခြေတစ်ဖက်မရှိတဲ့ ကလေးကို တွေ့လိုက်ရတော့ ကျွန်မရင်ထဲခံစားရတာ အမှန်ပါ။ အမေမွေးတုန်းက ခြေလက်အင်္ဂါပြည့်စုံပေမယ့် ဒီလိုဘဝမျိုး အမေကသားကို ပြန်တွေ့ခဲ့ရင် မိခင်ရင်မှာ ဘယ်လောက်ကြေကွဲမလဲဆိုတဲ့ ခံစားမှုမျိုး ကျွန်မရင်ထဲဖြစ်ပေါ်မိပါတယ်။

ကလေးရဲ့နာမည်ကို မေးလိုက်တော့ မောင်စောလှနိုင် (ခ) မောင်နိုင်စိုး ဖြစ်ကြောင်း၊ အသက် (၂၁) နှစ်ရှိပြီး၊ မွန်ပြည်နယ်၊ မုတ္တမမြို့ဇက်ဆိပ်အမှတ် (၂) မှာ မွေးချင်းမောင်နှမ (၄) ယောက်နဲ့အတူ မိခင်မုဆိုးမနဲ့ အတူနေထိုင်ပြီး၊ သူဟာ တတိယမြောက်သားဖြစ်တဲ့ အကြောင်းပြောပြပါတယ်။ လွန်ခဲ့တဲ့ (၆) နှစ်က ထိုင်းနိုင်ငံတောင်ပိုင်း ကျွန်ဖုန်မြို့မှာရှိတဲ့ ရော်ဘာခြံတွင် သွားရောက် အလုပ်လုပ်ကိုင်ခဲ့ပြီး၊ လွန်ခဲ့သော ၂လခန့်က ရော်ဘာခြံအတွင်း နေထိုင်ကြသူ မြန်မာအချင်းချင်း စကားများရာမှ မတော်တဆ ထိခိုက်မိပြီး ညာဘက်ခြေထောက် ဒူးအောက်ပိုင်း ပြတ်တောက်သွားခဲ့ရပါတယ်။ ကျွန်ဖုန်မြို့နယ်ဆေးရုံမှာ ၂ လကြာ တက်ရောက်ခဲ့ပြီး ဆေးရုံတက်စဉ်အချိန် ထိုင်းနိုင်ငံဆေးရုံမှ ဆရာမများ၏ ကူညီစောင့်ရှောက်မှုဖြင့် နေခဲ့ရကြောင်းပြောပြပါတယ်။ ၂ လပြည့်လို့ ခြေထောက် သက်သာချိန်မှာတော့ ဆရာမတွေရဲ့ ကူညီပေးမှုကြောင့် ဘန်ကောက်မြို့ပေါ်ရောက်ခဲ့ရပါတယ်။

ဘန်ကောက်မြို့မှ မဲဆောက်ကိုသွားရင် မုတ္တမပြန်လို့ရပြီဆိုတာ သိထားတာမို့ တွေ့တဲ့ မီးရထားပေါ် တက်စီးပြီးလာခဲ့တာ ကျင်းမိုင်မြို့ကိုရောက်သွားခဲ့ပါတယ်။ ကျင်းမိုင်မှတဆင့် မဲဆောက်သွားချင်ကြောင်း ပြောပေမယ့် နားကြားမှားပြီး၊ မယ်ဆိုင်ကားပေါ်ကို စီးနင်းလိုက်ပါခဲ့ရပြန်ပါတယ်။ မယ်ဆိုင်မြို့ရောက်မှ မဲဆောက်မြို့မဟုတ်ကြောင်း သိလိုက်ရတဲ့အတွက် အားကိုးတကြီး မြန်မာနိုင်ငံဘက်ကို ရောက်ရင် ကူညီမယ့်သူတွေ့မှာဘဲ ဆိုတဲ့အသိလေးနဲ့ အားကိုးစွာလာခဲ့ကြောင်း ပြောပြပါတယ်။

ကျွန်မလည်း မဇ္ဈိမလူမှုကူညီရေးအသင်း ဥက္ကဋ္ဌ ဦးတင့်ဆွေထံ အမြန်အကြောင်းကြားပြီး လောလောဆယ် နေထိုင်စားသောက်ရန်အတွက် စီစဉ်ရင်း ပြန်လည်ထူထောင်ရေးစခန်းမှ ဆရာဦးမိုးဦးအား အကူအညီတောင်းပြီး ၁ရက် ၂ရက်နေခွင့်ပြုပေးဖို့ အကူအညီတောင်းခဲ့ပါတယ်။

မဇ္ဈိမလူမှုကူညီရေးအသင်း ဥက္ကဋ္ဌ ဦးတင့်ဆွေမှာ တာချီလိတ်မြို့နယ်အုပ်ချုပ်ရေးမှူးနှင့်တကွ "ထိုင်းနိုင်ငံ မယ်ဆိုင်မြို့ရောက် မြန်မာနိုင်ငံသားများအား ကူညီစောင့်ရှောက်ရေးနှင့် စေ့စပ်ညှိနှိုင်းရေးကော်မတီ"နှင့် တွေ့ဆုံပေးခဲ့ပြီး နေရပ်ပြန်ရန်အတွက် အကူညီပေးခဲ့ကြပါတယ်။ ကြက်ခြေနီအသင်းမှလည်း ခြေတုတပ်ဆင်နိုင်ရန် ဆက်သွယ်မှုတွေ ပြုလုပ်ပေးလိုက်ပါတယ်။ ခရီးစရိတ်များကိုလည်း ကျွန်မတို့အသင်းနဲ့အတူ "ထိုင်းနိုင်ငံ မယ်ဆိုင်မြို့ရောက် မြန်မာနိုင်ငံသားများအား ကူညီစောင့်ရှောက်ရေးနှင့် စေ့စပ်ညှိနှိုင်းရေးကော်မတီ"မှလည်း လှူဒါန်းပေးခဲ့ကြပါတယ်။ လေယာဉ်ကွင်းအထိ ကျွန်မတို့ လိုက်လံပို့ဆောင်ပေးခဲ့ကြပါတယ်။

{ လေဆိပ်သို့ လိုက်ပါ ပို့ဆောင်ပေးစဉ်}

အရေးကြီးရင် သွေးစည်းတယ်ဆိုတဲ့ စကားအတိုင်း ကျွန်မတို့ မြန်မာတွေရဲ့စိတ်ဓာတ်က မြန်မာပြည်သား ဒုက္ခရောက်နေတာကို ကြည့်မနေဘဲ ဆွေမျိုးပမာ ကူညီစောင့်ရှောက်ကြတဲ့ စိတ်ဓာတ်က လေးစားလောက်ပါပေတယ်။ လေယာဉ်ကွင်းရောက်တော့ မိခင်ထံပြန်ရတော့မယ်၊ အမေ့ကိုတွေ့ရတော့မယ်ဆိုတဲ့ စိတ်ကြောင့် ဝမ်းသာမှုရင်မှာ အပြည့်ရှိနေပေမယ့် ဒုက္ခိတဘဝနဲ့ မိဘရင်ခွင်ပြန်နိုင်ဖို့ အားတင်းတဲ့ ခြေလှမ်းတွေနဲ့ လေယာဉ်ပေါ်ကို တက်သွားခဲ့ပါတယ်။ မောင်နိုင်စိုးရဲ့ နောက်ကျောပြင်ကိုကြည့်ရင်း ဝမ်းသာ၊ ဝမ်းနည်း ကျွန်မရင်ထဲမှာ ခံစားခဲ့ရပါတယ်။

ဝမ်းသာတာကတော့ အခက်အခဲတွေ၊ ဒုက္ခတွေကြုံခဲ့ရပေမယ့် ကူညီမယ့်သူတွေနဲ့ တွေ့ရပြီး အဆင်ပြေစွာ မိဘနဲ့ပြန်ဆက်သွယ်ပေးနိုင်ခဲ့တာကို ပီတိဖြင့် ဝမ်းသာရပေမယ့်၊ မွေးရပ်မြေ မုတ္တမမြို့မှာရှိတဲ့ အိမ်ကိုရောက်ရင်တော့အမေရေ သားပြန်လာပြီလို့ အော်ပြောလိုက်တဲ့ အချိန် ခွဲခွာနေတာကြာပြီး အဆက်အသွယ်မရတဲ့သားရဲ့ အသံကိုကြားလို့ အိမ်ထဲကနေ သားလေးပြန်လာပြီ ဆိုပြီး ပြေးထွက်လာမယ့် အမေတစ်ယောက်ရဲ့ ခြေလှမ်းတွေဟာ သားလေးမောင်နိုင်စိုးရဲ့ ဒုက္ခိတဘဝလေးကို တွေ့လိုက်တယ်ဆိုရင် မိခင်တစ်ယောက်ရဲ့ရင်ထဲက သားသမီးအပေါ် ထားရှိတဲ့မေတ္တာတွေနဲ့ ဆို့နင့်ကြေကွဲပြီး သားကိုရင်မှာပွေ့ဖက်လို့ ငိုလိုက်မည့်ဖြစ်ခြင်းရယ်လို့ ကျွန်မတွေးရင်း ဝမ်းနည်းမိပါတယ်။

ဒီဖြစ်ရပ်မှန်ဇာတ်လမ်းလေးဟာလည်း ကျွန်မတို့ မဇ္ဈိမလူမှုကူညီရေးအသင်းရဲ့ အမှတ်တရတစ်ခု ဖြစ်ရပြန်ပါတယ်။

အသက် (၂၁) နှစ်အရွယ်ဆိုတာ ပညာရှာရမယ့် အရွယ်ဘဲရှိပါသေးတယ်။ အခုတော့ မိသားစုစားဝတ်နေရေးကြောင့် မိဘကို လုပ်ကျွေးဖို့ ရေခြားမြေခြားတိုင်းတစ်ပါးကိုသွားပြီး ရတဲ့အလုပ် လုပ်၊ ဒုက္ခတွေနဲ့ရင်ဆိုင်နေကြရတာ အများကြီးပါဘဲ၊ အကောင်းဆုံးကတော့ ဒီအရွယ်မှာ မိဘရဲ့ အေးမြတဲ့ရင်ခွင်မှာနေပြီး လုံခြုံစိတ်ချရတဲ့ အမိမြန်မာနိုင်ငံတော်မှာဘဲ အလုပ်တွေလုပ်စေချင်ပါတယ်။

 အကယ်၍များ မသွားမဖြစ်လို့ တိုင်းတစ်ပါးကို အလုပ်သွားလုပ်ကြရတဲ့ လူငယ် မောင်မယ်များကို ပြောပြချင်တာကတော့ တိုင်းတစ်ပါးမှာ ဒုက္ခတွေနဲ့ တွေ့ကြုံတဲ့အခါ ငါတို့အတွက် အမိမြန်မာနိုင်ငံတော်မှာ မြန်မာနိုင်ငံသားတွေအတွက် ကူညီစောင့်ရှောက်ပေးတဲ့အသင်းတွေ အဖွဲ့တွေရှိနေပါလားဆိုတာကို မမေ့ပါနဲ့၊ သတိရလိုက်ပါ။ အခက်အခဲကြုံက အမိမြန်မာနိုင်ငံတော်ကို အမြန်ပြန်လာခဲ့ပါ။ မြန်မာနိုင်ငံမှာ ကူညီမယ့်သူတွေ အဆင်သင့်စောင့်ကြိုနေပါတယ်ဆိုတာ ကမ္ဘာတစ်ဝှမ်းမှာ နေထိုင်အလုပ်လုပ်နေကြတဲ့ မြန်မာနိုင်ငံသူ/သားတွေကို ပြောလိုက်ပါရစေ။

ဒီလိုဘဲ မောင်နိုင်စိုးအတွက် နွေးထွေးတဲ့ အမိရင်ခွင်မှာ နားခိုပြီး မိသားစုနဲ့ ကျန်ရှိတဲ့ ဘဝခရီးကို အားမလျှော့ဘဲ ယိုင်နေတဲ့ခြေလှမ်းတွေ ခြေတုလေးတပ်လို့ မယိမ်းမယိုင် ဆက်လက်လျှောက်လှမ်းနိုင်ပါစေလို့ မဇ္ဈိမလူမှုကူညီရေးအသင်းဥက္ကဋ္ဌ အစ်ကိုကြီး ဦးတင့်ဆွေနဲ့ ကျွန်မတို့ အသင်းသူ၊ အသင်းသားများမှ ဆုတောင်းပေးလိုက်ပါတယ်။

ဒီဆောင်းပါးလေးကို ကျွန်မနဲ့ ထပ်တူ ဝေမျှခံစားပေးနိုင်ကြပါစေ။

အများအတွက် ပေးဆပ်ရင်း ကျေနပ်နေမယ့်

ဒေါ်သန်းသန်းဌေး

မဇ္ဈိမလူမှုကူညီရေးအသင်း

▬▬▬▬▬▬▬▬▬▬▬▬▬▬▬▬▬▬
Tachileik Online News
web: www.tachileik.net
Facebook: www.fb.com/TachileikNews
Youtube: www.youtube.com/TachileikNews
Email: tachileik@tachileik.net
▬▬▬▬▬▬▬▬▬▬▬▬▬▬▬▬▬▬

မဇ္ဈိမလူမှုကူညီရေးအသင်း 

www.mizzimasas.com

---

လူမျိုး ဘာသာ 

ဆင်းရဲ ချမ်းသာ မခွဲပါ 

စွမ်းသမျှ အကုန် ပေးဆပ်မှာ 

အဲ့ဒါ မဇ္ဈိမလူမှုကူညီရေးအသင်းကြီး၏ 

ဆောင်ပုဒ်ပါ။